sa sa 1095
AMEA Molekulyar Biologiya və Biotexnologiyalar İnstitutunda gənc alim və mütəxəssislərin  elmi-tədqiqat işlərinin müsabiqəsi keçirilib + Foto İyl 16, 2021 | 11:20 / Mühüm hadisələr

İyulun 15-də AMEA Molekular Biologiya və Biotexnologiyalar İnstitutunun  yaradılmasının 5 illiyi münasibətilə institutun 30 yaşa qədər gənc alim və mütəxəssislərinin elmi-tədqiqat işlərinin müsabiqəsi keçirilib. Qaliblərin seçilməsində şəffaflığı təmin etmək məqsədilə institutun direktoru, AMEA-nın vitse-prezidenti, akademik İradə Hüseynovanın əmri ilə müvafiq müsabiqə komissiyası yaradılıb, həmçinin müsabiqə qaydaları təsdiqlənib. Müsabiqənin əsas məqsədi xüsusi tədqiqatçı istedadına malik gəncləri üzə çıxararaq həvəsləndirməkdən, onlara elmi araşdırma və təhlilaparma bacarıqlarını nümayiş etdirmək imkanı yaratmaqdan ibarət olub. Müsabiqəyə öz işlərini təqdim etmiş namizədlərin anket məlumatları, elmi əsərləri, yerinə yetirdikləri tədqiqat işlərinin aktuallığı, müasirliyi, metodologiyası, nəzəri və praktiki əhəmiyyəti komissiya tərəfindən ətraflı müzakirə olunub. Akademik İradə Hüseynova, müsabiqə komissiyasının və institutun elmi şurasının üzvləri namizədlərin elmi araşdırmalarını əks etdirən posterlərə baxış keçiriblər. Sonra namizədlər komissiya qarşısında çıxış edərək, üzvlərin çoxsaylı suallarını cavablandırıblar. Qeyd edilən proseslərdə AMEA Azad Həmkarlar İttifaqının sədr müavini, kimya elmləri doktoru, professor  Raya Nəcəfova da iştirak edib.

Nəticələrə əsasən, Populyasiya genomiksi laboratoriyasının kiçik elmi işçisi Lalə Axundova I yerə, Proteomiks beynəlxalq laboratoriyasının kiçik elmi işçisi Aynurə Paşayeva və Populyasiya genomiksi laboratoriyasının kiçik elmi işçisi Gülmirə Əlibəyova II yerə, Bioadaptasiya laboratoriyasının kiçik elmi işçisi Nərgiz Bayramova və Bionanotexnologiya beynəlxalq laboratoriyasının kiçik elmi işçisi Leyla Xəlilova isə III yerə layiq görülüb və müvafiq şəkildə mükafatlandırılıblar. 

Tədbirin sonunda akademik İradə Hüseynova gənc alim və mütəxəssislərə göstərilən qayğı və dəstəyə görə AMEA Azad Həmkarlar İttifaqının rəhbərliyinə öz dərin təşəkkürünü bildirib, qalibləri təbrik edib, onlara tövsiyələrini çatdırıb, gələcək elmi fəaliyyətlərində müvəffəqiyyətlər arzulayıb.