Oktyabrın 25-də AMEA Molekulyar Biologiya və Biotexnologiyalar İnstitutunun Elmi şurasının növbəti iclası keçirilib. İclası giriş sözü ilə açan AMEA-nın vitse-prezidenti, İnstitutun direktoru akademik İradə Hüseynova oktyabrın 22-də Tərtər rayonunun Şıxarx qəsəbəsində böyük Zəfər gününə həsr olunmuş “AMEA Genetik Ehtiyatlar İnstitutunun Qarabağ Elmi-Tədqiqat Bazasının infrastrukturunun bərpası, bölgə üçün yaradılmış buğda va arpa sortlarının toxumçuluğunun təşkili məsələləri” mövzusunda keçirilmiş tarla seminarı haqqında iclas iştirakçılarına məlumat verərək bildirib ki, seminar AMEA-nın Biologiya və Tibb Elmləri Bölməsinin işğaldan sonra qədim Qarabağ torpağında keçirilən ilk tədbirdir. Akademik Qarabağda ənənəvi sahələrin bərpası ilə yanaşı, kartof, tərəvəz, bostan və yem bitkilərinin də becərilməsinin,  bu sahələrin inkişafı üçün elmi tədqiqatların aparılmasının vacibliyini qeyd edib. 

Sonra iclasın sədri – akademik İ. Hüseynova Elmi şura üzvlərini gündəlikdə duran məsələlərlə tanış edib. O, şura üzvlərini AMEA-nın və respublikanın digər elm və ali təhsil müəssisələrində 2021-ci ildə aparılmış elmi tədqiqat işlərinin yekunlarına dair hesabatlar haqqında AMEA Rəyasət Heyətinin 1 oktyabr 2021-ci il tarixli 17/30 nömrəli qərarının mətni ilə tanış edib, hesabatların hazırlanması və vaxtında təqdim olunması üçün tövsiyyələr verib. İclasda institutun Karbonun fotosintetik assimilyasiyasının enzimologiyası laboratoriyasının baş elmi işçisi, b.e.d., dos. Şahniyar Bayramovun Yunanıstan Respublikasının Haniya şəhərində keçirilən Roxsi COST proqramının illik konfransında iştirakı ilə bağlı hesabatı dinlənilib, Hesablama struktur biologiyası laboratoriyasının böyük elmi işçisi Rəfiqə Məsməliyevanın Almaniyanın Hamburq Universitetində "CUl: Maddənin təkmilləşdirilmiş görünüşü" layihəsi çərçivəsində tədqiqatlar aparmaq üçün 2 il müddətinə akademik məzuniyyətə göndərilməsi, Zəfər bayramı ilə bağlı İnstitutda həyata keçiriləcək tədbirlər planı və digər  məsələlər geniş müzakirə olunub.